Alman dili fakültəsi alman mədəniyyətinin tərənnümçüsü olan böyük tarixi ənənəyə malik olan fakültədir. Alman dilinin XX əsrin əvvəllərindən aristokrat dili kimi öyrənilməsinə baxmayaraq bu dil 1930–cu illərdə pedaqoji universitetin tədris proqramına ixtisas fənni  kimi daxil edilmişdir. Bu fakültə öz müstəqil fəaliyyətinə 12 sentyabr 1949-cu ildə C. Cəfərovun dekan kimi rəhbərliyi altında başlamışdır.   Təhsilini Almaniyanın Humboldt Universitetində almış C. Cəfərov fakültənin alman təhsil sisteminin qaydalarına müvafiq təşkil olunmasına öz gərgin əməyi və səyi nəticəsində nail olmuşdur və həmin vaxtdan bu günə qədər Alman dili fakültəsi alman dili ixtisası üzrə müəllim  hazırlayır.

19 dekabr 2009-cu ildə fakültənin 60 illik yubileyinin beynəlxalq səviyyədə təntənə ilə qeyd olunması fakültənin fəaliyyət tarixinə verilən yüksək dəyər kimi konfrans iştirakçılarının yaddaşında silinməz iz buraxmışdır.

Alman dili fakültəsinin öz fəaliyyəti müddətində Almaniya universitetləri ilə daim elmi- yaradıcılıq və təhsil sahəsində uğurlu əlaqələri olmuşdur. Azərbaycan Respublikası öz müstəqilliyinə nail olduqdan sonra bu elmi və mədəni əlaqələr üçün daha geniş imkanlar yaranmışdır. Bunun nəticəsində 1999-cu ildə ADU ilə Almaniyanın Boxum Universiteti arasındakı əməkdaşlıq müqaviləsinə müvafiq alman dili fakültəsində eksperimental tədris üsulu tətbiq olunmuşdur. 2008-ci ildən isə bütün  fakültədə təhsil bu proqram əsasında həyata keçirilir. Hal-hazırda Avropanın aparıcı dövlətləri olan Almaniya və Avstriya kimi dövlətlərin  nüfuzlu universitetləri ilə elmi əməkdaşlıq əlaqələri  mövcuddur. Bu əlaqələrin sayəsində Almaniya və Avstriya dövlətlərinin yardımı ilə yeni elektron kitabxana və mədəniyyət mərkəzləri yaradılmışdır.

Alman dili fakültəsinin  2009-cu ildə  Almaniyanın Frayburg və 2010-cu ildən isə Avstriyanın Grats Universitetləri ilə imzalanmış əməkdaşlıq müqaviləsinə əsasən tələbə və müəllimlərin həmin universitetlərdə  təhsil almalarına, təkmilləşmələrinə və elmi tədqiqat işləri aparmalarına şərait yaradılmışdır. Bu baxımdan elmin inkişafı üçün dünya miqyaslı təşkilata çevrilmiş Alman Akademik Mübadilə Xidməti (DAAD)–nin əvəzsiz rolu danılmazdır. Qeyd edək ki, bu təşkilat  Azərbaycanda alman dili mütəxəssislərinin yetişdirilməsində böyük rol oynayır.

Alman dili fakültəsində professor F. Y. Veysəllinin rəhbərliyi ilə “Eksperimental fonetika və tətbiqi dilçilik”, dosent Ç. Qurbanlının rəhbərliyi ilə “Leksikologiya və leksikoqrafiq araşdırmalar” laboratoriyaları fəaliyyət göstərir. Fakültədə kafedra müdirlərindən, fakültənin müəllim və professor heyətindən, həmçinin Tələbə Həmkarlar Təşkilatı və Tələbə Elmi Cəmiyyətinin sədrləri daxil olmaqla 11 nəfərdən ibarət Fakültə Elmi Şurası vardır. Fakültə Elmi Şurası müəllimlərin seçki və müqavilə müddətinin təyin olunmasını müəyyənləşdirir, buraxılış işləri və magistr dissertasiyalarının mövzularını müzakirə və təsdiq edir, fakültə müəllimləri tərəfindən hazırlanan dərslik, dərs vəsaitləri və tədris proqramlarının nəşrinə rəy verir, gənc aspirant və doktorantların illik hesabatlarını dinləyərək onları attestasiyadan keçirir, saathesabı qaydası üzrə fəaliyyət  göstərəcək müəllimlərin müsabiqə yolu ilə seçiminə qərar verir, fakültənin əməkdaşlıq etdiyi universitetlərdə təhsil alacaq tələbələrin və təkmilləşmə kursu keçəcək müəllimlərin seçimini tənzimləyir, onların oradakı fəaliyyəti başa çatdıqdan sonra hesabatı dinlənilir və qiymətləndirilir. Pedaqoji praktikaya rəhbərlik edən metodist müəllimlərin hesabatı dinlənilir və onlara pedaqoji praktikanın təkmilləşməsi üçün innovativ təklif və tövsiyələr verilir.

Alman dili fakültəsinə 1976-1989-cu illərdə f.e.n., dosent  S. Ə. Abdullayev, 1989-1993-cü illərdə f.e.n., dosent  İ. H.  Məmmədov, 1994-2004 f.e.d., professor S. Ə. Abdullayev, 2004-2008-ci illərdə f.e.n, dosent Ç. H.  Qurbanlı rəhbərlik etmişdir.  8 iyul 2008-ci ildən isə f.e.n., dosent U. B.  Aslanova fakültəyə başçılıq edir.

Alman dili fakültəsində  2010/2011–ci tədris ilinin əyani şöbəsində bakalavr pilləsi üzrə 209 tələbə, magistratura pilləsi üzrə isə 8, qiyabi şöbəsində isə 1 tələbə təhsil alır.

Fakültədə aşağıdakı ixtisaslar mövcuddur:

I. Bakalavr pilləsi üzrə ixtisas:

Alman dili müəllimi (əyani şöbə)

II. Magistratura pilləsi üzrə ixtisaslar:

1. Dilşünaslıq

2. Xarici dil və ədəbiyyatın  tədrisi metodologiyası və metodikası (əyani və qiyabi şöbə)

Alman dili fakültəsinin tərkibində üç  kafedra fəaliyyət göstərir:

1. Alman dilinin leksikologiyası və üslubiyyatı kafedrası

2. Alman dilinin fonetikası, qrammatikası və dil tarixi kafedrası

3. Praktik ingilis dili kafedrası.

Fakültədə iki növbəli tədris prosesi iki nömrəli tədris binasında həyata keçirilir. Fakültənin nəzdində müasir kompüter, audio və video qurğularla təchiz olunmuş auditoriyalar tələbə və müəllimlərin sərəncamındadır. Bu da informasiya-kommunikasiya texnologiyaları əsasında tədrisin müasir standartlara müvafiq təşkilinə zəmin yaradır. 

2005–ci ildən fakültədə tədris boloniya təhsil sisteminin prinsiplərinə müvafiq həyata keçirilir. Tədris fənləri günün tələblərinə cavab verən müasir proqram və dərsliklərlə keçilir. İxtisas  fənlərindən ayrı-ayrı kurslar üzrə kompleks dərsliklər Universitet rəhbərliyinin qayğısı və zəhməti sayəsində Almaniyadan gətirilmişdir. Heç şübhəsiz ki, bu dərsliklər müasir dünya standartlarına cavab verə biləcək alman dili müəllimlərinin hazırlanmasında əvəzsiz rol oynayır.