|
“Elm və
alim heç vaxt özünə qapana bilməz,
çərçivədə dura bilməz”
Azərbaycan Dillər Universitetində (ADU)
universitetin gənc doktorant və
dissertantları ilə görüş keçirildi. Akt
zalında keçirilən görüşdə universitetin
rektoru, millət vəkili, professor Səməd
Seyidov çıxış edərək universitet
tarixində doktorant və dissertantlarla
çox çoxsaylı görüşlərin keçirildiyini
qeyd etdi. ADU-nun elmi potensialının
ildən-ildən artdığını deyən S. Seyidov
məhz bunun nəticəsində də elmə gənc
kadrların axın etdiyini dilə gətirdi.
Bildirdi ki, vaxtilə tək-tük dissertant
və aspirantlar var idi: “Elm dalınca
getmək istəyənlər çox fikirləşirdilər ki,
bu yolu harada davam etdirsinlər. Bu
fikrə düşəndə SSRİ-nin müxtəlif
ölkələrinə getməli olurdular. Çətinliklə
üzləşirdilər. Bu çətinliklərə görə də
elmi yarımçıq buraxırdılar. Bunun da
nəticəsində alimlər ordusu zəifləmişdi”.
Səməd Seyidov əlavə etdi ki, Azərbaycan
öz müstəqilliyini əldə etdikdən sonra
elmin inkişafı əsas istiqamətlərdən biri
oldu. İstər ölkədə, istərsə də ADU-da
elmlə məşğul olan şəxsin həm də ölkəmizi
xaricdə tanınması üçün mühit
yaradılmasına çalışdıqlarını söyləyən
rektor dedi ki, əsas məqsəd həm də
alimin geniş miqyasda tanınmasıdır: “Elm
və alim heç vaxt özünə qapana bilməz,
çərçivədə dura bilməz. Əgər siz
dissertant və doktorantlar, o çərçivədən
çıxa bilmisinizsə, elmlə məşğul olmağa
layiqsiniz”. Müasir alimin bir dillə
kifayətlənməli olmadığını deyən S.
Seyidov alimin bütün sahələrlə
maraqlanmasının vacibliyini vurğuladı:
“Əgər alim elm zirvəsinə çatıbsa, orada
dayanmamalıdır, fəaliyyətinə davam
etməlidir. Elm, alim heç zaman qocalmır.
Hər zaman müasirdir, gəncdir”. Elmi
araşdırmalarda ziddiyyət, inkar və
paradoks olmadan elmin inkişafının
qeyri-mümkün olduğunu deyən S. Seyidov
gənc dissertant və doktorantlara uğurlar
arzuladı.
Sonra qəbul imtahanlarında yüksək bal
toplamış doktorantlara vəsiqələr verildi
və kitablar hədiyyə edildi.
Sonra çıxış edən doktorantlar – Günel
Xəlilova və Nigar Əliyeva yaradılan
şəraitə görə universitet rəhbərliyinə
təşəkkür edərək elmdə yenilik etməyə
çalışacaqlarını bildirdilər.
ADU-nun professorları Əfqan Abdullayev,
Fəxrəddin Veysəlli, Azad Məmmədov,
Mehbarə Qayıbova çıxış edərək
doktorant və dissertantlara uğurlar
arzulayaraq onlara dəyərli tövsiyələrini
verdilər.
Sonda ADU-nun Elmi işlər üzrə prorektoru,
professor Dünyamin Yunusov doktorant və
dissertantların görəcəyi işlər barədə
məlumat verdi. |
|
